الابتكار في البزنس مودل هو سر - العدد #7
الابتكار هو المحرك الأساسي لأي بزنس، وهو السبب اللي يخلي شركات تطلع للسما، وممكن يكون نفس السبب اللي يخلي شركات عملاقة تنهار، شركات كانت في يوم من الأيام هي رمز للتميز.
تبي تعرف ليش؟ وكيف ممكن تبتكر في نموذج العمل الخاص فيك؟ خليك معاي.
بشكل بسيط، "نموذج العمل" أو الـ Business Model هو الخريطة اللي توريك كيف البزنس حقك يصنع قيمة، ولمين يقدمها، وإيش يحتاج من موارد عشان يستمر. لكن المهم مو بس إنك تبني نموذج عمل، الأهم هو كيف تبتكر فيه عشان تخلق ميزة تنافسية أو ترفع أرباحك.
وهنا بعطيك ٣ قواعد أساسية تساعدك في هذي المهمة:
القاعدة الأولى: استغل التقنية عشان "تعيد تصميم" نموذج العمل
التقنية اليوم ما هي مجرد أداة مساعدة، هي الركيزة اللي تقدر تبني عليها بزنس مودل جديد بالكامل. شوف مثلاً نتفليكس، كيف قدرت تستغل الإنترنت وتغير مفهوم تأجير الأفلام. بدال ما تروح المحل وتستأجر فيلم، وممكن ما تلاقيه، وتدفع غرامات تأخير، نتفليكس جابت لك مكتبة أفلام كاملة في بيتك، تشوفها بأي وقت وباشتراك شهري. هنا التقنية حلت "نقاط ألم" كانت موجودة في النموذج القديم.
وعندنا مثال ثاني زي أمازون، اللي ما اكتفت تكون مجرد متجر إلكتروني، بل حولت نفسها لمنظومة متكاملة (Ecosystem) وفتحت المجال لبائعين ثانيين يستخدمون منصتها ومواردها. وحتى على المستوى المحلي، شوف كيف منصات مثل سلة و زد غيروا مفهوم التجارة الإلكترونية عندنا، وسهلوا على أي شخص يفتح متجر في دقايق. زمان كنت تحتاج مبرمج، مصمم، محاسب، وتتفق مع شركات شحن وتوصيل، وتربط بوابات دفع... الحين كل هذا صار بضغطة زر.
القاعدة الثانية: غير "طريقة تقديم" المنتج
أحيانًا الابتكار ما يكون في المنتج نفسه، بل في طريقة تقديمه للعميل. "كيف" تبيع ممكن يكون أهم من "إيش" تبيع.
خذ عندك شركة Primark للملابس، موقعهم الإلكتروني ما تشتري منه، وظيفته بس يعلمك إذا القطعة اللي تبيها متوفرة في أي فرع. ليش؟ عشان هدفهم كان واضح وصريح: يقللون من تكاليف المرتجعات العالية، ويخلونك تجي بنفسك للفرع، وهالشي غالبًا يخليك تشتري أشياء ثانية ما كنت مخطط لها.
مثال ثاني هو مايكروسوفت، حولت برامج أوفيس (وورد، إكسل...) من منتج تشتريه مرة وحدة، إلى خدمة باشتراك شهري (Microsoft 365). هذا التغيير ضمن لهم إيرادات مستمرة ومضمونة، وبنفس الوقت أعطاهم ميزة تنافسية، زي لما أضافوا ذكاء كوبايلوت الاصطناعي لخدماتهم وصار متاح للمشتركين.
القاعدة الثالثة: اعرف وين "نقاط الألم" وصمم تجربة أفضل
أحيانًا نموذج العمل يكون كويس، بس داخله فيه مشاكل أو "نقاط ألم" تسبب خسائر أو تخلي العميل مو راضي. لا تبدأ بالتقنية، ابدأ بالسؤال: "وين أكبر هدر للموارد عندنا؟" أو "إيش أكثر شكوى تتكرر من عملائنا؟".
سلسلة المتاجر ALDI مثال بطل على هذي النقطة. ركزوا على فكرة بسيطة جدًا: يصغرون حجم محلاتهم، ويقللون عدد الخطوات اللي يحتاجها العميل عشان يشتري. هذا التفكير البسيط خلاهم في 2022 من أسرع المتاجر نموًا في العالم، لدرجة صاروا يفتحون 100 فرع في السنة! رقم مجنون.
الخلاصة، الابتكار في نموذج عملك يرتكز على ٣ قواعد:
1. استغل التقنية عشان تعيد تصميم النموذج بالكامل.
2. غير طريقة تقديمك للمنتج، مو شرط المنتج نفسه.
3. ابحث عن نقاط الألم في عملياتك أو عند عميلك، وقدم حلول لها.
بعد ما قريت هذا الكلام،
إيش أول فكرة جت في بالك عشان تعيد تصميم البزنس الخاص فيك؟
